ఈ 6 అలవాట్లు ఉంటే.. మీరు ఎప్పటికీ కోటీశ్వరుడు కాలేరు !

ఈ 6 అలవాట్లు ఉంటే.. మీరు ఎప్పటికీ కోటీశ్వరుడు కాలేరు !

ఎదగడానికైనా... పాతాళానికి పడిపోవడానికైనా మన అలవాట్లే కారణమవుతాయి. చిన్న అలవాటే కదా.. దాంతో ఏమవుతుంది అనుకుంటాం కానీ.. అవే మన జీవితాన్ని నిర్దేశిస్తాయి. ఇప్పుడు మనం చూడబోయే అలవాట్లు కూడా అదే కోవకు చెందుతాయి. మీ ఆర్థిక క్రమశిక్షణను పక్కదారి పట్టించి మీ లక్ష్యాలను దూరం చేసే హ్యాబిట్స్ ఇవే. అందుకే మీరు తక్షణం వాటిని గుర్తించి, కంట్రోల్ చేసుకునే ప్రయత్నం చేయండి. అప్పుడే మీరు ఫైనాన్షియల్లీ ఫిట్ అవుతారు. బ్యాంక్ సేవింగ్స్ డిపాజిట్‌లో అధిక మొత్తంలో డబ్బులు ఉంచుకోవడం వంటివి చిన్న అంశాలే అనిపించినా.. అది కూడా ఓ బ్యాడ్ హ్యాబిట్ కావొచ్చు. 

1. రీసెర్చ్ లేకుండా స్టాక్స్‌లో పెట్టుబడి
ఈ మధ్య స్టాక్ మార్కెట్లలో వస్తున్న అనూహ్యమైన అమ్మకాల ఒత్తిడి ఇన్వెస్టర్లకు కంటిమీద కునుకు లేకుండా చేస్తోంది. బడ్జెట్ ఎఫెక్ట్‌తో రోజుకు కనీసం 500 స్టాక్స్ 52 వారాల కనిష్టానికి దిగొస్తున్నాయి. ఇక మిడ్, స్మాల్ క్యాప్ స్టాక్స్ సంగతి ప్రత్యేకంగా చెప్పాల్సిన పనిలేదు. అందుకే స్వీయ పరిశోధనతో పాటు నిపుణుల సలహాలు తీసుకుంటే కనీసం కొద్ది నష్టాలతో అయినా మనం బయటపడే వీలుంటుంది. ఒక్కో సారి మనకు తెలియని పిసి జ్యువెలర్స్, డిహెచ్ఎఫ్ఎల్, మన్‌పసంద్ బెవరేజెస్ వంటి ఉదంతాలు బయటపడి మన వాటిల్లో ఇరుక్కుని ఉంటే ఇక చేయగలిగిందేమీ లేదు. ఏడాది క్రితం రూ.600 ఉన్న డిహెచ్ఎఫ్ఎల్ స్టాక్ ఇప్పుడు రూ.40కి పడిపోయింది. ఇలాంటి షాక్స్ ఉంటాయి స్టాక్స్‌ను కాబట్టి జాగ్రత్తగా ఎంపిక చేసుకోవడం మంచిది. ఇవే కాదు యెస్ బ్యాంక్, ఇండియాబుల్స్ హౌసింగ్ ఫైనాన్స్, టాటా మోటార్స్ వంటి ప్రముఖ కంపెనీల పరిస్థితీ ఇలానే ఉంది. 

2. పోర్ట్‌ఫోలియోలో ఎక్కువ స్టాక్స్, ఫండ్స్ వద్దు
డైవర్సిఫికేషన్ ఉండాలనే మాట మనం చాలాసార్లు వింటూ ఉంటాం. అంటే రిస్కును తగ్గించుకునేందుకు వివిధ మార్గాలు అన్వేషిస్తాం. అయితే చాలా మంది చేసే పొరపాటు ఏంటంటే.. తమ పోర్ట్‌ఫోలియోను అత్యధిక స్టాక్స్, మ్యూచువల్ ఫండ్స్‌తో నింపేస్తూ ఉంటారు. నిపుణుల విశ్లేషణ ప్రకారం ఓ మోడర్న్ పోర్ట్‌ఫోలియోలో 15-20కి మించి స్టాక్స్ సరిపోతాయి. అది కూడా వివిధ రంగాలకు చెందినవై ఉండాలి. 
మ్యూచువల్ ఫండ్స్‌కి కూడా ఇదే రూల్ వర్తిస్తుంది. కొన్ని ఈక్విటీ బ్లూచిప్, కొన్ని ఎమర్జింగ్ మిడ్ క్యాప్ ఫండ్స్, అతికొద్దిగా స్మాల్ క్యాప్ ఫండ్స్ పోర్ట్‌ఫోలియోలో ఉండడం మంచిది. 

3. హెల్త్ ఇన్సూరెన్స్ మస్ట్
సాధారణంగా అధిక శాతం మంది దీన్ని పెద్దగా పరిగణలోకి తీసుకోరు. సిగ్నా అనే హెల్త్ ఇన్సూరెన్స్ సంస్థ ఈ మధ్య చేసిన సర్వేలో ఏం తేలింది అంటే.. తమ రిటైర్మైంట్ కోసం దాచుకున్న సొమ్మును 40వ ఏటనే వైద్య ఖర్చులకు వినియోగించేస్తున్నారని తేలింది. అంటే చాలా మంది హెల్త్ ఇన్సూరెన్స్ తీసుకోవడానికి అంతగా మొగ్గుచూపడం లేదు. ఒక్క అనారోగ్య సమస్య ఏళ్లకు ఏళ్లు కూడబెట్టుకున్న సొమ్మంతటినీ కరిగించేస్తుంది అనడంలో ఎలాంటి సందేహమూ లేదు. అందుకే ఎలాంటి రెండో ఆలోచనా లేకుండా ముందుగా ఆరోగ్య బీమా తీసుకునే అంశాన్ని తప్పకుండా పరిశీలించండి. 

4. ట్యాక్స్ కోసం ఇన్సూరెన్స్ కొనొద్దు
ఏటా కోట్ల మంది జనాలు ట్యాక్స్ తగ్గించుకునేందుకు కోట్ల రూపాయల ధనాన్ని ఇన్సూరెన్సుల కోసం వెచ్చిస్తూ ఉంటారు. వాస్తవానికి ఇది సరైన పద్ధతి కాదు. మన ఫైనాన్షియల్ కండిషన్, అవసరాలను దృష్టిలో ఉంచుకుని ఇన్సూరెన్స్ తీసుకోవాలి కానీ ఇలా పన్ను తగ్గుతుందని, ఇన్వెస్ట్‌మెంట్‌గా కూడా పనికొస్తుందనే ఉద్దేశంతో వీటిని కొనుగోలు చేయొద్దు. టర్మ్ ఇన్సూరెన్స్‌లో మనీ బ్యాక్ పాలసీలు వంటి వాటికి కూడా దూరంగా ఉండాలి. యూలిప్స్ వంటివి మరీ యంగ్ ఏజ్‌లో ఉన్నవాళ్లకు ఉపయోగపడ్తాయి కానీ.. అందరికీ ఉపయోగపడవు. అందుకే ఇన్సూరెన్స్‌ను ఇన్వెస్ట్‌మెంట్‌ను ట్యాక్స్ ప్లానింగ్‌ను మిళితం చేయకుండా దేనికి దాన్ని ప్రత్యేకంగా చూడాలి. 

5. ఉద్యోగాలు వదిలేసి సొంత వెంచర్స్
ఐబీఎం చేసిన తాజా పరిశోధన ప్రకారం ప్రతీ 100 స్టార్టప్స్‌లో కేవలం 10 మాత్రమే నిలదొక్కుకుని ఐదేళ్లు, ఆ పైన మనుగడను సాధిస్తాయి. మిగిలినవన్నీ మధ్యలో గాల్లో కలిసిపోతుంటాయి. దీనికి కారణం పటిష్టమైన రీసెర్చ్ లేకుండా స్టార్టప్ వ్యాపారాల్లోకి దిగి చేతులు కాల్చుకోవడమే. అధిక శాతం మంది వాంటర్‌ప్రెన్యూర్స్ కావాలనుకుంటారు కానీ... ఆంట్రప్రెన్యూర్స్ అవలేరు. వాంటర్ ప్రెన్యూర్స్.. అంటే.. పారిశ్రామికవేత్తలు కావాలని కలలుగనే వారు మాత్రమే. ఎంతటి కష్టమొచ్చని నిలదొక్కుకునే మానసిక, ఆర్థిక స్థిరత్వం ఉన్నవాళ్లే ఇందులోకి దిగాలి. 
స్థిరంగా ఉన్న ఉద్యోగాన్ని వదులుకుని ఇలాంటి వాటిల్లోకి దూకేముందు అన్నీ ఆలోచించుకోవాలి. లేకపోతే ఇబ్బంది పడాల్సి వస్తుంది. అలా అని ధైర్యం చేయొద్దనీ, ఉద్యోగులుగానే మిగిలిపోవాలని చెప్పడం లేదు. పక్కాగా రీసెర్చ్‌ చేసి దిగితేనే ఆ తర్వాత ఇబ్బందులు లేకుండా చూసుకోవచ్చు. 

6. అప్పుల కుప్ప పేర్చుకోవద్దు
క్రెడిట్ కార్డుల ఫ్రాడ్స్ ఈ మధ్య బాగా పెరిగిపోతున్నాయి. అందుకే బ్యాంక్స్ నుంచి వచ్చే ఎస్ఎమ్ఎస్‌లను జాగ్రత్తగా చూసుకోవాల్సి ఉంటుంది. అజాగ్రత్తగా ఉంటే ఇరుక్కుపోతాం.
మరో ముఖ్యమైన అంశం క్రెడిట్ కార్డ్ ఛార్జీల గురించి. బ్యాలెన్స్ రోలోవర్ చేసుకుంటూ వెళ్లడం మనలో చాలా మందికి అలవాటు. దీని వల్ల నెలకు రెండు నుంచి మూడు శాతం వడ్డీగా చెల్లించడంతో పాటు లేట్ పేమెంట్ ఛార్జీలు రూ.500 వరకూ కట్టాలి. ఇలా నెలనెలా కట్టుకుంటే పోయే డబ్బును లెక్కగడితే మీరు బ్యాంకుకు ఎంతలేదన్నా ఏడాదికి 70-80 శాతం వరకూ వడ్డీని కడ్తూ ఉంటారనే సంగతిని కనుక్కోలేరు. అందుకే అప్పుల కుప్పను పేర్చుకోవద్దు. పెట్టుబడుల సంగతి పక్కనబెట్టి ముందు అప్పులను సాధ్యమైనంత వరకూ తీర్చుకునే ప్రయత్నం చేయండి. 

Change these habits if you want to become financially sound and healthy. these bad habits will land you in debt trap and finally you may loose all the wealth you acquired over the years. 
 



Most Popular